Sunday, August 13, 2017

திரு ஆர்.எம்.டி.சம்பந்தம்: அவியாச் சுடர் -ரவிக்குமார்



இன்று (14.08.2016) தினமணி நாளேட்டின் முன்னாள் ஆசிரியர் திரு ஆர்.எம்.டி.சம்பந்தம் அவர்களது நினைவுநாள். தமிழ் இதழியலில் முன்மாதிரியாகக் கொள்ளத்தக்கவர் அவர். தற்போது பிபிசி தமிழோசையின் ஆசிரியராக இருக்கும் நண்பர் மணிவண்ணன் அவர்களின் மூலமாகத்தான் எனக்கு அவர் அறிமுகமானார். தினமணியில் நடுப்பக்கக் கட்டுரை எழுதும் வாய்ப்பை அவர் அளித்தார். 'ரஜினியின் காட்சி அரசியல்' என்ற எனது கட்டுரை அப்போதுதான் வெளியானது. கை தெபோர் என்ற ஃப்ரெஞ்ச் சிந்தனையாளரின் politics of spectacle என்ற கருத்தாக்கத்தைப் பயன்படுத்தி அந்தக் கட்டுரையை நான் எழுதியிருந்தேன். 

அதிமுக ஆட்சியை விமர்சித்துப் பேசி ரஜினி பரபரப்பை ஏற்படுத்தியிருந்த நேரம் அது. அவர் அரசியல் கட்சி ஆரம்பிக்கப்போகிறார் என பேசப்பட்டுக்கொண்டிருந்த சூழலில் அந்தக் கட்டுரை வெளியானது. அப்போது ரஜினியுடன் நெருக்கமாக இருந்த திரு ஆர்.எம்.வீ அதைப் படித்துவிட்டு தன்னிடம் மிகவும் கோபத்துடன் கடிந்துகொண்டதாக திரு சம்பந்தம் அவர்கள் என்னிடம் சொன்னார். 

திரு ஆர்.எம்.வீ அத்துடன் விடவில்லை அடுத்த சில நாட்களில் பாண்டிச்சேரியில் ரஜினி ரசிகர்மன்ற நிர்வாகி ஒருவரின் இல்லத் திருமணத்துக்கு வந்தவர் அந்த நிர்வாகியிடம் தினமணியில் கட்டுரை எழுதும் ரவிக்குமார் யார்? எனக் கேட்டிருக்கிறார். அப்போது தினமணியில் நிருபராக இருந்தவரும் இப்போது குணவதிமைந்தன் என்ற பெயரில் குறும்படங்களை இயக்கிக்கொண்டிருப்பவருமான  ரவி என்ற நண்பரை அந்த நிர்வாகி அழைத்துப்போய் ஆர்.எம்.வீயிடம் நிறுத்தியிருக்கிறார். 'ரஜினியின் காட்சி அரசியல்' என்ற கட்டுரையை எழுதியது அவர்தான் என நினைத்து ஆர்.எம்.வீ அவரிடம் கோபமாகப் பேசியுள்ளார். " அவரை கட்சி ஆரம்பிக்கச்சொல்லி நான் எவ்வளவோ சமாதானப்படுத்தி வைத்திருந்தேன். இப்படி கட்டுரை எழுதி கெடுத்துட்டியே" என்று திட்டியிருக்கிறார். 'கட்டுரை எழுதிய நபர் நான் இல்லை' என அவர் விளக்கமளித்துவிட்டுத் திரும்பியிருக்கிறார். 

திரு சம்பந்தம் அவர்களுக்கு ஆர்.எம்.வீயுடன் நெருங்கிய நட்பிருந்ததாக நான் கேள்விப்பட்டிருக்கிறேன். அப்படியிருந்தும் அவர் எனது கட்டுரையை வெளியிட்டதற்காக வருத்தப்படவில்லை. மாறாக, தினமணியில் வேலையில் சேருமாறு எனக்கு அழைப்பு விடுத்தார். 

என்னை ஒரு பத்திரிகையாளர் ஆக்கவேண்டும் என்று திரு ஆர்.எம்.டி.சம்பந்தம் ஆசைப்பட்டார். அவர் ஏற்றிய அந்தச் சுடர் இப்போதும் எனக்குள் அணையாமல் இருக்கிறது.

மனித உரிமை செயற்பாட்டாளர்களுக்கு ஒரு கை விளக்கு - ரவிக்குமார்


நீதித்துறை தொடர்பாக சாதாரண மனிதர்களும் அறிந்துகொள்ளும் விதமாக எழுதப்படும் நூல்கள் தமிழில் குறைவு. தான் வழங்கிய தீர்ப்புகளுக்கு அம்பேத்கரின் தத்துவம் எப்படி வெளிச்சமாகப் பயன்பட்டது என்பதை நீதிபதி கே.சந்துரு நூலாக எழுதினார்தான் நடத்திய சட்டப் போராட்டங்களில் பெற்ற தீர்ப்புகளை பழ.நெடுமாறன் அவர்கள் இப்போது தமிழாக்கம் செய்து வெளியிட்டிருக்கிறார்


'உரிமைகளை நிலைநிறுத்திய உன்னதத் தீர்ப்புகள் ' என்ற தலைப்பில் வெளியாகியிருக்கும் அந்த நூலில் 18 தீர்ப்புகளும், இரண்டு மனுக்களும்  தொகுக்கப்பட்டுள்ளன. கருத்துரிமையை நிலைநாட்டியவை, கறுப்பு சட்டங்களுக்கு எதிரானவை, மரண தண்டனையை தடுத்து நிறுத்தியவை, ஈழத்தமிழர்களுக்கு ஆதரவானவை என நான்கு பிரிவுகளாக அந்தத் தீர்ப்புகள் பகுக்கப்பட்டுள்ளன. இவற்றில் சென்னை  உயர்நீதிமன்றத்தில் நடத்தப்பட்டு பெறப்பட்ட பெரும்பாலான தீர்ப்புகள் நீதிபதி கே.சந்துரு அவர்கள் மூத்த வழக்கறிஞராக இருந்தபோது வாதாடிப் பெற்றவை


மனித உரிமைகளைப் பறிப்பதில் ஆட்சியாளர்கள் காட்டும் ஆர்வம், அவர்களது நோக்கத்தை நிறைவேற்றும் விதமாகக் காவல்துறை செயல்படும் விதம் முதலானவற்றை இந்தத் தீர்ப்புகளில் நாம் அறியமுடிகிறது. அவர்கள் பொய்யாகப் புனையும் வழக்குகளிலிருந்து விடுபட சந்துரு போன்ற சட்ட நுணுக்கங்களும், கடப்பாடும் கொண்ட வழக்கறிஞர்கள் மட்டுமல்லாது சட்டத்தின் குரலுக்கு செவிகளையும், இதயத்தையும் திறந்துவைத்திருக்கிற நீதிபதிகளும் தேவைப்படுகிறார்கள்


காவல்துறை சாட்டும் குற்றம் நிரூபிக்கப்படாதபோது குற்றம் சாட்டப்பட்டவரை நீதிமன்றம் விடுதலைசெய்கிறது. ஆனால் காவல்துறை பொய்யாக ஒரு வழக்கை புனையும்போது அது வெளிப்படையாக நீதிமன்றத்துக்குத் தெரியும்போது அதற்குக் காரணமானவர்கள்மீது ஏன் நடவடிக்கை எடுக்கக்கூடாது? என்ற கேள்வி நமக்கு எழுகிறது. இந்த நூலில் 15 ஆவதாகக் கொடுக்கப்பட்டுள்ள பரந்தாமன் அவர்கள் மீதான வழக்கின் தீர்ப்பு இதற்கொரு சான்று. அவர் தனது கோழிப்பண்ணையில் ஜெலட்டின் குச்சிகளை ஒளித்து வைத்திருந்ததாக கூறப்பட்ட குற்றச்சாட்டு எப்படி வேண்டுமென்றே புனையப்பட்டுள்ளது என்பதை பூந்தமல்லி மாவட்ட நடுவராக இருந்த நீதிபதி பி. முருகன் தனது தீர்ப்பில் அம்பலப்படுத்தியிருக்கிறார். குற்றம்சாட்டப்பட்டவரை விடுதலை செய்ததோடு அவர் நின்றுவிட்டார். பொய்யாக வழக்குப் பதிவு செய்தது மட்டுமின்றி அதற்கு ஆதாரங்களையும் திட்டமிட்ட முறையில் ஜோடித்த காவல்துறைமீது எந்த நடவடிக்கையையும் அவர் பரிந்துரைக்கவில்லை

இத்தகைய வழக்குகளில் நீதிமன்றம் அரசு தரப்பின்மீது சிறு கண்டனத்தைக்கூட பதிவுசெய்யாமல் விடும்போது மீண்டும் அதே காரியத்தில் காவல்துறையினர் பயமின்றி ஈடுபட அது வழிவகுக்கிறது. எனவே, நீதியைக் காப்பாற்றினால் மட்டும்போதாது அநீதியைத் தண்டிக்கவும் நமது நீதித்துறை முன்வரவேண்டும். மார்டின் லூதர் கிங் கூறியதை இங்கே நினைவுகூர்வது பொருந்தும்: " எங்கோ ஒரு இடத்தில் அநீதி இழைக்கப்படும்போது அது எல்லா இடங்களிலும் நீதியை அச்சுறுத்துகிறது" . இதை நமது நீதிபதிகள் கவனத்தில் கொள்ளவேண்டும்


வழக்கறிஞர்கள் மட்டுமின்றி மனித உரிமை செயற்பாட்டாளர்கள், ஜனநாயக உரிமைகளுக்காகப் போராடும் அரசியல் தலைவர்கள் ஆகியோரும்  இந்த நூலை அவசியம் படிக்கவேண்டும்


ஆங்கிலத்தில் வழங்கப்பட்ட இந்தத் தீர்ப்புகளை வழக்கறிஞர் தமித்தலட்சுமி தீனதயாளன் படிப்பவர்களுக்குப் புரியும் விதமாகத் தமிழாக்கம் செய்துள்ளார்


தமிழ்த் தேசிய அரசியல் தலைவராக அறியப்பட்ட பழ. நெடுமாறன் அவர்களை இந்த நூல் ஒரு மனித உரிமைப் போராளியாக நமக்கு அடையாளம் காட்டுகிறது. தமிழ்த் தேசியம் என்பதை இனவெறியாக, பாசிசமாகக் குறுக்கும் முயற்சி தீவிரமாக நடந்துவரும் இன்றைய சூழலில் இந்தத் தொகுப்பு தமிழ்த் தேசியத்துக்கும் மனித உரிமைப் போராட்டத்துக்குமான உறவை எடுத்துக்காட்டுகிறது. இந்த நூல் வெளியீட்டில் ஈடுபட்ட அனைவருமே நம்  பாராட்டுக்குரியவர்கள்தான்


வெளியீடு :

தமிழ்க்குலம் பதிப்பாலயம், சென்னை 43

போன்: 044- 2264 0451 


பக்கங்கள் : 247

விலை 200/- ரூபாய் 







Sunday, August 6, 2017

திரு சசி பெருமாள் அவர்கள் மறைந்து இரண்டு ஆண்டுகள் !



திரு சசிபெருமாள் அவர்களின் நல்லடக்கத்தின்போது அஞ்சலி செலுத்தி நான் ஆற்றிய இரங்கலுரையின் சுருக்கம் : 
==============
மது ஒழிப்புப் போராட்டத்தில் தன் இன்னுயிரை இழந்த அய்யா சசிபெருமாள் அவர்களுக்கு விடுதலைச் சிறுத்தைகள் கட்சியின் சார்பில் அஞ்சலி செலுத்துகிறேன். அவரது குடும்பத்தினருக்கு என் ஆழ்ந்த இரங்கலைத் தெரிவித்துக்கொள்கிறேன். 

இன்று பிரதமர் நரேந்திர மோடி சென்னைக்கு வந்திருக்கிறார். பிரதமராகப் பதவியேற்று முதல் முறையாகத் தமிழகம் வந்திருக்கும் பிரதமர் தமிழ்நாட்டு முதலமைச்சரை வீட்டில் போய் சந்தித்திருக்கிறார். இந்தியாவின் மாநிலங்கள் அனைத்திலும் மதுவிலக்கு ரத்துசெய்யப்பட்ட காலத்திலும் மதுக் கடைகளை அனுமதிக்காத மாநிலம் குஜராத். காந்திக்கு மரியாதை செய்வதற்காக அவர் பிறந்த குஜராத்தில் மதுக்கடைகளைத் திறப்பதில்லை. மது விற்பனையால் வரும் வருவாய் இல்லாமலேயே குஜராத் வளர்ச்சியடைந்திருக்கிறது என்று சொல்லித்தான் மோடி தேர்தலில் வாக்கு கேட்டார் இன்று பிரதமராகவும் வந்துவிட்டார். 

தமிழ்நாட்டின் முதன்மையான சமூக அரசியல் பிரச்சனையாக மதுவிலக்கு மாறியிருக்கிறது என்பதை பிரதமரிடம் இன்று யாராவது கூறியிருக்கலாம். அதைக் கேட்டிருந்தால் மது விற்பனையால் வரும் வருமானம் இல்லாமலேயே குஜராத் மாநிலத்தில் தான் எப்படி ஆட்சி செய்தேன் என்பதை தமிழக முதல்வரிடத்தில் அவர் கூறியிருக்கலாம். மதுவிலக்கை நடைமுறைப்படுத்தினால் ஏற்படும் வருவாய் இழப்பை ஈடுகட்ட மத்திய அரசு நிதி உதவி செய்யும் என்றும் வாக்களித்திருக்கலாம். ஏனென்றால் மதுவிலக்கு என்பது மாநிலப் பிரச்சனை மட்டுமல்ல, அது ஒரு தேசியப் பிரச்சனை. 

அரசியலமைப்புச் சட்டத்திலேயே மதுவிலக்கை தேசியக் கொள்கையாக்குவதற்கு நடவடிக்கை எடுக்கவேண்டும் என்று கூறப்பட்டிருக்கிறது. அதன் அடிப்படையில்தான் இரண்டாவது ஐந்தாண்டுத் திட்டத்திலும் மூன்றாவது ஐந்தாண்டுத் திட்டத்திலும் அதற்காக நிதி ஒதுக்கினார்கள். 

மதுவிலக்கை நடைமுறைப்படுத்துவதற்காக மத்திய அரசால் நியமிக்கப்பட்ட இரண்டு ஆணையங்களும் மதுவிலக்கை நடைமுறைப்படுத்தினால் மாநில அரசுகளுக்கு ஏற்படும் வருவாய் இழப்பை மத்திய அரசு ஈடுகட்டவேண்டும் என்றுதான் பரிந்துரை செய்துள்ளன. 

இப்போது தமிழ்நாட்டிலிருக்கும் பாஜக மதுக்கடைகளை மூடவேண்டும் எனப் போராடி வருகிறது. அதை வரவேற்கிறோம். அக்கட்சியின் தமிழகத் தலைவர் தமிழிசை அவர்கள் உணர்வுபூர்வமாக அதை வலியுறுத்துகிறார். இங்கே அமர்ந்திருக்கும் அய்யா இலக்கியச்செல்வரின் மகளாக இருப்பதால் மற்றவர்களைவிடக் கூடுதலான அக்கறை அவருக்கு இருக்கும். அய்யா சசிபெருமாளுக்கு அஞ்சலி செலுத்தும் இந்த மேடையிலிருந்து ஒரு வேண்டுகோளை அவரிடம் வைக்கிறேன். நீங்கள் உங்கள் தலைமையிடம் எடுத்துச் சொல்லுங்கள், உங்கள் கட்சியைச் சார்ந்த பிரதமரிடம் வலியுறுத்துங்கள். 'மது ஒழிப்பை தேசியக் கொள்கையாக அறிவியுங்கள்! மதுவிலக்கால் மாநிலங்களுக்கு ஏற்படும் வருவாய் இழப்பை ஈடுகட்ட மத்திய அரசு நிதி வழங்கவேண்டும் என அறிவியுங்கள்!' என பிரதமரிடம் வலியுறுத்துங்கள். 

தமிழ்நாட்டில் முழுமையான மதுவிலக்கை அறிவிக்கவேண்டும். அது ஒன்றுதான் அய்யா சசிபெருமாள் அவர்களுக்குத் தமிழக அரசு செலுத்தும் அஞ்சலியாக இருக்கும்.

மணற்கேணியின் புதிய நூல்

பெண்ணியத்தின் பல்வேறு பரிமாணங்களை எடுத்துக்காட்டும் முக்கியமான நூல். பிரதிகளுக்கு தொடர்புகொள்க: மணற்கேணி +91 81109 06001



Monday, July 17, 2017

ரவிக்குமார் கவிதை

 

பகலில் எரிந்துகொண்டிருக்கும் 
தெருவிளக்குபோல்
இவன் நேசம்

நாய்க்குட்டிக்கு வைக்கும் சோற்றை
கோழிகள் தின்றுவிடுகின்றன என்கிறாய் நீ

காக்கை வராததால் 
விரதத்தோடு காத்திருக்கிறேன் என்கிறான் இவன்


2015 ல் எழுதியது

Friday, July 14, 2017

மணற்கேணி ஆய்விதழ் குறித்து தினமணி ஆசிரியர் திரு வைத்தியநாதன்

21.04.2013 தினமணி நாளேட்டில் அதன் ஆசிரியர் திரு வைத்தியநாதன் அவர்கள் ' கலாரசிகன்' என்ற பெயரில் எழுதியிருக்கும் பத்தியில் மணற்கேணி ஆய்விதழ் குறித்து எழுதியிருக்கிறார். அவருக்கு நன்றி.இங்கே அதைப் படியுங்கள்: 

நண்பர் ஒருவரின் மேஜையில் ரவிக்குமார்  நடத்தும் "மணற்கேணி' இருமாத இதழின் நவம்பர் - டிசம்பர் 2012 இதழ் இருந்தது.  இப்படி ஓர் அற்புதமான இலக்கிய ஆய்வு இதழை நண்பர் ரவிக்குமார் நடத்தி வருவதற்காகவே அவருக்கு ஒரு பாராட்டு விழா எடுக்க வேண்டும்.

புதுவையில் "மணற்கேணி' சார்பில் நடத்திய, "தமிழும் சமஸ்கிருதமும்' என்கிற ஆய்வரங்கச் சொற்பொழிவுகள் கட்டுரைகளாகத் தரப்பட்டிருக்கின்றன. அ. மணவாளன், இரா. கோதண்டராமன், பெ. மாதையன், இரா. அறவேந்தன், பக்தவத்சல பாரதி ஆகியோரின் சிந்தனையைத் தூண்டும் வாதங்கள் வருங்கால ஆய்வுகளுக்கே கூடத் தரவுகளாக அமையும் தன்மையன.

அம்பை எழுதியிருக்கும் "மரத்தடியில் திருவள்ளுவர்' என்கிற சிறுகதை, தமிழும் தமிழனும் இன்று எப்படி இருக்கிறார்கள் என்பதை உணர்த்துவதாக இருக்கிறது. படித்து முடித்து விட்டு, அடுத்த பக்கத்தைத் திருப்புவதற்கு பதிலாக, மீண்டும் ஒருமுறை படிக்கத் தோன்றியது.
அரை நூற்றாண்டு காலத் தொல்லியல் ஆய்வைப் பற்றிய சிறப்புப் பகுதியில் படிக்க வேண்டிய 33 நூல்களையும், தொல்லியல் துறை தொடர்பாகச் செய்ய வேண்டிய 50 பரிந்துரைகளையும் தொகுத்து வழங்கி இருப்பது பயனுள்ள முயற்சி.
ஐயாயிரம் ரூபாய் கொடுத்து "மணற்கேணி'யின் புரவலராகலாம்; மூவாயிரம் கொடுத்து "மணற்கேணி' குழாமில் சேரலாம்; ஆயிரம் கொடுத்து "ஊருணி' திட்டத்தின் மூலம் யாருக்காவது "மணற்கேணி' பரிசளிக்கலாம். முன்னூற்று அறுபது கொடுத்து ஆண்டு சந்தாதாரர் ஆகலாம். என்ன செய்வது என்பதை நீங்களே முடிவு செய்து கொள்ளுங்கள். ஆனால், தமிழில் வெளிவந்து கொண்டிருக்கும் சிற்றிதழ்களிலிருந்து முற்றிலும் மாறுபட்டு, தனக்கெனத் தனித்துவமானதொரு அடையாளத்தை உருவாக்கிக்கொண்டு இலக்கியப் பணியாற்றிவரும் "மணற்கேணி' தொடர்ந்து வெளிவர உதவாமல் இருந்து விடாதீர்கள். தொடர்புக்கு9443033305 அல்லது manarkeni@gmail.com.

Saturday, July 8, 2017

நாம் என்ன செய்யப்போகிறோம்? - ஃபைஸ் அகமது ஃபைஸ் தமிழில்: ரவிக்குமார்



எண்ணற்ற ஏக்கங்கள்
சமைந்து கிடக்கின்றன 
உனது விழிகளில் எனது விழிகளில்
வகிரப்பட்ட இருதயங்கள்
திருகிக்கொண்டு கிடக்கின்றன 
உனது தேகத்தில் எனது தேகத்தில்
மரத்துப்போன விரல்கள்
செயலற்ற எழுதுகோல்கள்
விறைத்துச் சிதைந்த மனங்கள்
நமது விருப்பத்துக்குரிய 
நகரின்
ஒவ்வொரு வீதியிலும் 
சமாதியாக்கப்பட்டுள்ளன 
உனது தடங்கள் எனது தடங்கள்

நமது இரவு விண்மீன்கள்
திறந்த புண்கள் 
நமது காலை ரோஜாக்களின்
உதிர்ந்த இதழ்கள்
இருட் காற்று சூறையாடி
பிய்த்தெறியப்பட்ட விழித்திரைகள்
குணப்படுத்தமுடியாதவை
நமது வாதைகள்
ஆற்ற இயலாதவை 
நமது காயங்கள் 
சிலவற்றின்மீது 
நிலவின் சாம்பல்
சிலவற்றின்மீது
காலைப் பனியின் ரத்தம்
இது நிஜமா? 
இது பிரமையா? 
இது
உனது எனது மூடநம்பிக்கையெனும் 
சிலந்தி பின்னிய வலை மட்டும்தானா ? 

இது உண்மையென்றால்
நாம் என்ன செய்யப்போகிறோம்?
இது உண்மையில்லையென்றால்
நாம் என்ன செய்யப்போகிறோம்?
எனது புத்தியில் கூர் ஏற்று.
எனக்குப் புரிதலை உண்டாக்கு. 
சொல்!

( ஃபைஸ் அகமது ஃபைஸின் O City of Lights , OUP, 2006 தொகுப்பிலிருந்து )


Tuesday, July 4, 2017

யாருமில்லை ஹமா துமா தமிழில்: ரவிக்குமார்

I

இறந்துபோன மனிதன் 
அவன் யாருமில்லை, கிழிசல்களை உடுத்தியிருந்தான், 
செருப்புகூட இல்லை
சட்டைப்பையில் ஒரு நாணயம்
அடையாள அட்டை ஏதுமில்லை
பேருந்துக்கான பயணச் சீட்டும் இல்லை
அவன் யாருமில்லை
அழுக்காக, எலும்பும் தோலுமாக
அடையாளமற்றவன், அவன் யாருமில்லை, 
இறப்பதற்கு முன்னர் கையை இறுக மூடியிருந்தான் 
கஷ்டப்பட்டு அவர்கள் அவன் விரல்களைப் பிரித்துப் பார்த்தபோது 
அந்த யாருமில்லை என்ற 
மனிதனின் கையில்
மொத்த நாடும் இருக்கக் கண்டார்கள்  

* ஹமா துமா : எதியோப்பிய கவிஞர், சிறுகதை ஆசிரியர், அரசியல் செயற்பாட்டாளர். தற்போது ஃப்ரான்ஸில் வாழ்கிறார்


Friday, June 16, 2017

துப்புரவுத் தொழிலாளர்களை வஞ்சிக்கும் பாஜக அரசு - ரவிக்குமார்



* துப்புரவுத் தொழிலாளர் மறுவாழ்வுக்கான நிதி ஒதுக்கீடு 2013-14ல் 557 கோடி, 2017-18 பட்ஜெட்டில் மோடி அரசு ஒதுக்கியிருப்பது வெறும் 50 கோடி

* 2014-15 ல் பாஜக அரசு பட்ஜெட்டில் இதற்காக 439.04 கோடி ஒதுக்கி 47 கோடி மட்டுமே செலவு செய்தது

* 2015-16 பட்ஜெட்டில் துப்புரவு தொழிலாளர் மறுவாழ்வுக்கு 470.19கோடி ஒதுக்கப்பட்டு 10.01 கோடி மட்டும்தான் செலவிடப்பட்டது

* 2016-17 பட்ஜெட்டில் வெறும் 10 கோடி மட்டுமே ஒதுக்கப்பட்டது. அதிலும் ஒரே ஒரு கோடி மட்டும்தான் செலவிடப்பட்டது

இதை காங்கிரஸ் உள்ளிட்ட எந்தவொரு எதிர்கட்சியும் சுட்டிக்காட்டவோ எதிர்க்கவோ இல்லை என்பதுதான் மிகப்பெரிய அவலம்

கும்பலாட்சியிலிருந்து கொடுங்கோன்மைக்கு’ - நூல் வெளியீட்டு விழா : ஒரு பதிவு - மருதன்




தோழர் ரவிக்குமாருடன் விரிவாக உரையாடும் வாய்ப்பு இன்று கிடைத்தது. பெரியார் குறித்த அவருடைய 'சர்ச்சைக்குரிய' நிலைப்பாடு, கலைஞர், திராவிட இயக்கம், ஹியூகோ கொரிஞ்சியின் புதிய நூல், மணற்கேணி இதழ், அம்பேத்கர், நிறப்பிரிகை என்று பல விஷயங்களைப் பேசினார். நடப்பு அரசியல் பின்னணியில் சமீபத்தில் அவர் எழுதிய பல்வேறு கட்டுரைகள், ‘கும்பலாட்சியிலிருந்து கொடுங்கோன்மைக்கு’ என்னும் தலைப்பில் நூலாக தொகுக்கப்பட்டிருக்கிறது. இந்நூலின் வெளியீட்டு விழாவில் கலந்துகொள்வதற்காக அம்பேத்கர் திடல் சென்றிருந்தேன்.

தலைப்பு சரிதான், ஆனால் ‘தலித் பார்வையில் பாஜக ஆட்சி’ என்னும் உப தலைப்பை ரவிக்குமார் வைத்தது ஏன் என்னும் கேள்வியை எழுப்பினார் சிறப்புரை ஆற்றிய தோழர் ஜி. ராமகிருஷ்ணன். ‘மதவாதம், வெறுப்பு அரசியல், சாதிய பாகுபாடுகள், தீண்டாமை, வகுப்புவாதம் என்று அனைத்தையும் ரவிக்குமார் இடதுசாரி நிலைப்பாட்டில் நின்று எதிர்த்திருக்கும்போது எதற்குத் தனியாக ‘தலித் பார்வையில்’ என்று  அட்டையில் குறிப்பிடவேண்டும்?’ வலதுசாரிகளின் பலம் சமீபகாலமாக பெருகிவருவது குறித்து அவநம்பிக்கை கொள்ளவேண்டியதில்லை என்றார் ஜிஆர். மகாராஷ்டிரா, மத்தியப் பிரதேசம் ஆகிய பகுதிகளில் விவசாயிகள் கிளர்ந்தெழுந்து போராட்டத்தில் ஈடுபட்டிருப்பது நம்பிக்கையளிக்கும்படியாக இருக்கிறது. குறைந்தபட்ச கொள்முதல் விலை நிர்ணயம், கடன் தள்ளுபடி என்று மாநில அரசாங்கங்கள் இறங்கிவருவது இந்தப் போராட்டங்களுக்குக் கிடைத்த வெற்றி. ‘வர்க்கப் போரட்டத்தின் ஒரு பகுதியாகவே விவசாயப் போராட்டத்தை எடுத்துக்கொள்ளவேண்டும்.’ என்றார் தோழர் ஜிஆர்.

‘தலித் பார்வையில் பாஜக ’ என்று உபதலைப்பு இடவேண்டிய அவசியத்தை ரவிக்குமார் பின்னர் விளக்கினார். பாஜகவின் தலித் வாக்கு வங்கி முன்பைவிட இப்போது அதிகரித்திருக்கிறது. ராம் விலாஸ் பாஸ்வான், அத்வாலே ஆகிய தலித் தலைவர்களை உள்ளிழுத்துக்கொண்டு தலித் வாக்குகளைத் தீவிரமாக வேட்டையாடிக்கொண்டிருக்கிறது மோடியின் பாஜக. கேரளாவில் அய்யன்காளி புகழ் பாடுகிறார் மோடி. அவ்வாறே நாராயண குருவையும் பயன்படுத்திக்கொள்ளத் துடிக்கிறார். மற்றொரு பக்கம், புரட்சியாளர் அம்பேத்கரை இந்துத்துவ வலைக்குள் சிக்கவைக்க அவர் கட்சியினர் முயன்றுகொண்டிருக்கிறார்கள். தலித்துகளைக் கவர்ந்திழுக்கவும் நாங்கள் ஒடுக்கப்பட்ட மக்களின் நண்பர்கள்தாம் என்று காட்டிக்கொள்ளவும் இத்தகைய முயற்சிகளில் மோடி ஈடுபட்டு வருகிறார். இது தவறான, மோசடியான போக்கு என்பதை நிரூபிக்கவேண்டும். நடைபெறுவது தலித்துகளுக்கும் விரோதமான ஆட்சி என்பதை அழுத்தமாக உணர்த்தவே அந்த உபதலைப்பு என்றார் ரவிக்குமார்.

முஸ்லிம்களுக்கும் தலித்துகளுக்கும் மட்டுமல்ல; தற்சமயம் நடைபெறுவது அனைத்து மக்களுக்கும் எதிரான ஆட்சி என்றார் ஜவாஹிருல்லா. மோடியின் ஆட்சியை ஏன் ஜனநாயக ஆட்சி என்று அழைக்கமுடியாது என்பதை விரிவாக விவரித்தார் திருமாவளவன். மக்களின் முடிவுகள் அல்ல, குறிப்பிட்ட சில கும்பல்களின் முடிவுகளே இன்று நம்மை ஆதிக்கம் செய்கின்றன. நம் அன்றாட வாழ்வில் இந்தக் கும்பல்கள் தலையிட்டுக்கொண்டிருக்கின்றன. ஒருவருடைய வீட்டு சமையலறைக்குள் சென்று, என்ன சமைக்கப்பட்டிருக்கிறது என்று சரிபார்த்து பிறகு தாக்கும் துணிச்சல் எங்கிருந்து சிலருக்கு வருகிறது? மாடுகளை ஏற்றிச்செல்லும் வண்டிகளை இடைமறித்து, தகுந்த ஆவணங்கள் இருந்தாலும் தாக்கும் அதிகாரத்தைச் சிலருக்கு யார் அளித்தது? இந்தக் கும்பல்கள் தங்களுக்கான அதிகாரத்தை எங்கிருந்து பெறுகின்றன? 

மீண்டும் மோடி தேர்ந்தெடுக்கப்பட்டால் தற்போது நிலவும் கும்பலாட்சி கொடுங்கோன்மை ஆட்சியாக மாறிவிடும். கும்பலாட்சிக்கு சட்ட அங்கீகாரம் கிடையாது. ஆனால் கொடுங்கோன்மை ஆட்சிக்கு அந்த அங்கீகாரமும் கிடைத்துவிடும். அப்படி நேர்வதை நாம் அனுமதிக்கக்கூடாது என்றார் திருமாவளவன். மத்தியில் மட்டுமல்ல தமிழகத்திலும் பாஜக ஆட்சியைக் கைப்பற்ற மேற்கொள்ளும் ஆபத்தான முயற்சிகளை அவர் சுட்டிக்காட்டினார். ‘விமரிசனங்கள் பல இருந்தாலும் அதிமுக ஆட்சி கலைக்கப்படுவதை நாங்கள் எதிர்ப்பதற்குக் காரணம் அதுதான். திமுகமீதும்கூட விமரிசனங்கள் இருக்கின்றன என்றாலும் பாஜக அவர்களையும் சேர்த்தே வீழ்த்த நினைக்கிறது. அதிமுகவின் இடத்தில் ஒருவேளை சிபிஎம் வந்து அமர்ந்தால் ரத்தனக் கம்பளம் விரித்து வரவேற்கலாம். ஆனால் பாஜக போன்ற ஜனநாயக விரோத சக்திகள் வருவதை எப்படிப் பொறுத்துக்கொள்ளமுடியும்?’

வகுப்புவாத அபாயத்துக்கு எதிரான அணிதிரட்டலை எப்படி மேற்கொள்வது? ஒடுக்கப்பட்ட, புறக்கணிக்கப்பட்ட மக்களை ஒன்றிணைப்பதன்மூலம் என்றனர் திருமாவளவனும் ரவிக்குமாரும். வர்க்க உணர்வை வலுப்படுத்துவதன்மூலம்  என்றார் தோழர் ஜிஆர். 

அழைப்புக்கும் உரையாடலுக்கும் நன்றி, தோழர்  ரவிக்குமார்.  உங்கள் முயற்சிகள் வெற்றிபெற வாழ்த்துகள். விடுதலைச் சிறுத்தைகள் அமைப்பின் தோழர்கள் முகமது யூசுஃப், சிந்தனைச்செல்வன் இருவருக்கும் நன்றியும் வாழ்த்துகளும்.

( தோழர் மருதன் அவர்கள் தனது முகநூல் பக்கத்தில் இட்டிருக்கும் பதிவு ) 

Thursday, May 18, 2017

Civility in politics - A round table


Civility in politics என்ற தலைப்பில் The Hindu Centre for Politics and Public Policy அமைப்பும் , அமெரிக்க தூதரகமும் இணைந்து கருத்துப் பரிமாற்றக் கூட்டம் ஒன்றை இன்று ஏற்பாடு செய்திருந்தனர். அதில் பங்கேற்க நான் அழைக்கப்பட்டிருந்தேன். 

அமெரிக்காவைச் சேர்ந்த செனட்டர் டேப் எம் பீட்டர்ஸ் ( குடியரசுக் கட்சி) பிரதிநிதி ஹெலென் எம் கீலி ( ஜனநாயகக் கட்சி ) ஆகியோர் சிறப்பு அழைப்பாளர்களாக வந்திருந்தனர். 

பாஜக மாநிலத் தலைவர் தமிழிசை, சிபிஐ எம் மாநிலங்களவை உறுப்பினர் டி.கே.ஆர், அதிமுக முன்னாள் அமைச்சர் பாண்டியராஜன், திமுக சார்பில் முன்னாள் அமைச்சர் பூங்கோதை, மனு சுந்தரம், இளைஞர் காங்கிரஸ் யுவராஜ், இந்திய யூனியன் முஸ்லிம் லீக் தலைவர் காதர் மொஹிதீன் ஆகியோர் அரசியல் கட்சிகளின் சார்பில் கலந்துகொண்டனர். 

நீதிபதி கே.சந்துரு, முன்னாள் துணைவேந்தர் வசந்திதேவி, முன்னாள் மாநிலத் தலைமைத்  தேர்தல் அதிகாரி நரேஷ் குப்தா, முன்னாள் தேசிய பாதுகாப்பு ஆலோசகர் எம்.கே.நாராயணன் ஆகியோரும் பங்கேற்றனர். 

என். ராம் தலைமை வகித்தார். வி.எஸ்.சம்பந்தன் அறிமுகவுரையாற்றினார். 

சுமார் இரண்டரை மணி நேரம் நடைபெற்ற கூட்டத்தில் பயன்மிக்க கருத்துகள் பரிமாறிக்கொள்ளப்பட்டன. அரசியலில் கண்ணியமும் நாகரிகமும் குறைந்துவருவது உலகளாவிய போக்காக இருப்பதை எல்லோருமே கவலையோடு சுட்டிக் காட்டினார்கள். 

ஏற்றத் தாழ்வை அங்கீகரிக்கும் சமூக ஒழுங்குக்கும் சமத்துவத்தை உத்தரவாதப்படுத்தும் அரசியலமைப்பு சட்டம் உள்ளிட்ட சட்டங்களுக்கும் இடையே உள்ள முரண்பாடு எப்படி அரசியல் நாகரிகத்துக்கு எதிராக உள்ளது என்பதை நான் சுட்டிக்காட்டினேன். அதிகரித்துவரும் வெறுப்புக் குற்றங்கள் அவற்றைத் தடுப்பதற்கு தனியே சட்டம் எதுவும் இல்லாதது, ஐநா ஒப்பந்தத்தில் கையெழுத்திட்டபோதும் வெறுப்புக் குற்றங்களைத் தடுக்க இந்தியா சட்டம் இயற்றாதது ஆகியவற்றை விவரித்தேன். தற்போது இந்தியாவை அச்சுறுத்தும் வகுப்புவாதம் எப்படி அரசியல் நாகரிகத்துக்கு எதிராக செயல்படுகிறது என்பதை சுட்டிக்காட்டினேன். 

பத்திரிகையாளர்கள் கே.பி.சுனில், விஜயசங்கர், ஆர்.கே, கோலப்பன், அரவிந்தன் ஆகியோரும் வந்திருந்தனர்

Sunday, May 14, 2017

மனிதனுக்கு முன்னால் - கே.சச்சிதானந்தன் தமிழில்: ரவிக்குமார்


மனிதர்கள் பேசத் தொடங்குவதற்கு முன்னால் 
மிருகங்கள் பேசின
மிருகங்களுக்கு முன்னால் மரங்கள் பேசின, மரங்களுக்கு முன்னால் மலைகள் பேசின, மலைகளுக்கு முன்னால் சமுத்திரங்கள் பேசின, சமுத்திரங்களுக்கு முன்னால் ஆகாயம் பேசியது

பிறகு, பேசத் தொடங்கினான் மனிதன், 
அந்த கணத்தில் அற்றுப்போனது அனைத்தின் பேச்சுகளும் 
அவற்றின் மௌனத்தின் மீது உருண்டது மனிதனின் எஃகு போன்ற குரல்

விடியலின்போது நீங்கள் பார்ப்பதில்லையா எல்லாவற்றின்மீதும் படிந்திருக்கும் ரத்தத்தை?

Friday, May 12, 2017

ஃபேஸ் புக் லைவ் மூலம் நூல்கள் அறிமுகம் : ஒரு அறிவிப்பு

 

முக்கியமான தமிழ், ஆங்கில நூல்களை ஃபேஸ் புக் லைவ் மூலம் அறிமுகப்படுத்தி வருகிறேன்.அதைக் காண்பதற்கு நண்பர்கள் காட்டிவரும் ஆர்வம் ஊக்கமளிக்கிறது. 

இனி வாரத்துக்கு இரண்டு நூல்கள் அறிமுகப்படுத்தப்படும். அதன் இரண்டு நிமிட வீடியோ ட்விட்டரிலும் பகிரப்படும்.


Education Census reveals the pathetic condition of Tamilnadu

Shocking!
Education Census reveals the pathetic condition of Tamilnadu 

- Ravikumar 

Tamilnadu has a huge number of illiterate population. More than two Crore people are illiterate. 

In Tamilnadu 122 lakh women are illiterate

Tamilnadu has 81 lakh male illiterates

In Tamilnadu only 7.70% population is graduates

In Tamilnadu total number of people studied  graduate and above is 5457742

In Tamilnadu number of male graduates is 3119342

In Tamilnadu total number of female graduates is 2338400

Sunday, May 7, 2017

மத்திய அரசின் நிலத்தடிநீர் மசோதா: விவசாயிகளின்மீது இன்னொரு தாக்குதல் - ரவிக்குமார்



நிலத்தடி நீர் பயன்பாட்டை முறைப்படுத்துகிறோம் என்ற பெயரில் விவசாயப் பயன்பாட்டுக்கு பம்ப் செட்டுகள் மூலம் எடுக்கப்படும் நிலத்தடி நீருக்குக் கட்டணம் வசூலிக்கும் முயற்சியில் சட்டம் ஒன்றை இயற்றுவதற்கு மத்திய அரசு நடவடிக்கை எடுத்துள்ளது. அதற்கான சட்ட மசோதா இப்போது மாநில அரசுகளுக்கு அனுப்பப்பட்டிருக்கிறது. இது தொடர்பாக இன்று இந்து ஆங்கில நாளேட்டில் செய்திக் கட்டுரை ஒன்று வெளியாகியிருக்கிறது. 


மத்திய அரசு கொண்டுவரும் இந்த சட்டம் 14 ஆவது நிதிக்குழு பரிந்துரைகளின் ஒரு அம்சம் ஆகும். 2015 ல் 14 ஆவது நிதிக்குழு அறிக்கை வெளியானபோதே அதில் இடம்பெற்றிருந்த விவசாயிகளுக்கு எதிரான அம்சங்களை நான் சுட்டிக்காட்டி கட்டுரைகளை எழுதினேன். 2015 பிப்ரவரியில் நான் 26.02.2015 அன்று எழுதிய கட்டுரை ஒன்றின் ஒரு பகுதியை இங்கே தருகிறேன்: 


=====

விவசாயிகளுக்கு வேட்டுவைக்கும் 14 ஆவது நிதிக்குழு பரிந்துரைகள் 



14 ஆவது நிதிக்குழுவின் பரிந்துரைகளை ஏற்றுக்கொள்வதாக மத்திய அரசு அறிவித்திருக்கிறது. அந்தப் பரிந்துரைகளில் முக்கியமானவை பொதுமக்கள் பயன்படுத்தும் வசதிகள் தொடர்பான பரிந்துரைகளாகும். பாசனத்துக்குப் பயன்படுத்தப்படும் தண்ணீரையும் அளக்கவேண்டும்; மின் மோட்டார்கள் அனைத்துக்கும் மீட்டர் பொருத்தவேண்டும் என அந்தப் பரிந்துரைகளில் சொல்லப்பட்டிருக்கிறது. 


பரிந்துரை எண் 84 முதல் 92 வரை அதுகுறித்துப் பேசப்பட்டிருக்கிறது. மின்சார நுகர்வு அனைத்துக்கும் ஒரு குறிப்பிட்ட காலக்கெடுவுக்குள் மீட்டர் பொருத்தப்படவேண்டும் என அதில் வலியுறுத்தப்பட்டுள்ளது. இது இலவச மின்சாரம் வழங்கும் திட்டத்துக்கு உலை வைப்பதுதவிர வேறல்ல. 


குடிதண்ணீர் மட்டுமின்றி பாசனத்துக்குப் பயன்படுத்தப்படும் தண்ணீரையும் அளப்பதற்கு 2017 ஆம் ஆண்டுக்குள் மீட்டர் பொருத்தவேண்டும். குடிப்பதற்கும், பாசனத்துக்கும் பிற தேவைகளுக்கும் பயன்படுத்தப்படும் தண்ணீர் அனைத்துக்கும் கட்டணத்தை நிர்ணயிப்பதற்கு சுயேச்சையான அமைப்பு ஒன்றை மாநில அரசுகள் உருவாக்கவேண்டும் என அது பரிந்துரை செய்திருக்கிறது. 


இந்தப் பரிந்துரைகளை மத்திய அரசு அப்படியே ஏற்றுக்கொண்டிருப்பது அதிர்ச்சி அளிப்பதாக உள்ளது. நிலம் கையகப்படுத்துதல் தொடர்பான திருத்த மசோதாவின் அச்சுறுத்தலிலிருந்து விவசாயிகள் விடுபடாத நிலையில் மேலும் அவர்கள்மீது தாக்குதலைத் தொடுத்திருக்கிறது மத்திய அரசு. இந்தப் பரிந்துரைகளைத் தமிழக அரசு ஏற்று நடைமுறைப்படுத்தப் போகிறதா? அல்லது தனது எதிர்ப்பை மத்திய அரசுக்குத் தெரிவிக்கப்போகிறதா? 


 

Thursday, May 4, 2017

மே 5: அயோத்திதாசப் பண்டிதர் ( 1845-1914) நினைவு நாள்



அயோத்திதாசப் பண்டிதர் 1845ஆம் ஆண்டு மே மாதம் 20ஆம் தேதி சென்னையில் பிறந்தார்.  அவரது தந்தையாரின் பெயர் கந்தசாமி, தாயாரின் பெயர் தெரியவில்லை.  அயோத்திதாசருக்கு அவரது பெற்றோர் இட்ட பெயர் காத்தவராயன் என்பதாகும்.  அவரது தாத்தா கந்தப்பன் என்பவர் ஜார்ஜ் ஆரிங்டன் பிரபு என்பாரிடம் பட்லராகப் பணியாற்றியவர். அவரும் தமிழ் மீது பற்றுக் கொண்டவர்.  அவர்தான் திருக்குறள் மற்றும் நாலடி நானூறு ஆகிய நூல்களின் ஓலைப் பிரதிகளைத் தமது பாதுகாப்பில் வைத்திருந்து எல்லீஸ் துரையிடம் கொடுத்தவர்.  அந்தப் படிகளே பின்னர் அச்சில் வெளியிடப்பட்டன. ஆங்கிலேயரிடம் பணிபுரிந்த காரணத்தால் கந்தப்பனுக்கு ஆங்கிலத்திலும் நல்ல தேர்ச்சி இருந்தது.

சென்னையில் இருந்த காலத்தில் பத்ர தேசிகானந்தர் என்பவரிடமும்,  அயோத்திதாச கவிராஜ பண்டிதர் என்பவரிடமும் தமிழ் மொழியின் இலக்கண, இலக்கியங்களையும் அயோத்திதாசர் ஆழமாகக் கற்றுத் தேர்ந்தார்.  இவை மட்டுமன்றி. சமற்கிருதம், பாலி, ஆங்கிலம் ஆகிய மொழிகளையும் அவர் கற்றுத் தேர்ந்தார்.  தனது இயற்பெயரை விடுத்து  தனது ஆசிரியர்களில் ஒருவரான அயோத்திதாச கவிராஜ பண்டிதரின் பெயரையே தனக்குச் சூட்டிக் கொண்டார்.  இதனிடையே அவரது தந்தையாருடைய பணியின் நிமித்தமாக அயோத்திதாசரின் குடும்பம் குன்னூருக்குக் குடி பெயர்ந்தது.

இளம் வயதினராயிருந்த அயோத்திதாசர் தான் ஈட்டிய அறிவைப் பூட்டி வைத்திருக்கவில்லை.  அதை அரசியலில் துணிவோடு இணைத்து நடைமுறைப் பணிகளில் ஈடுபட்டார்.  குன்னூர் பகுதிகளில் வாழ்ந்திருந்த தோடர் என்னும் பழங்குடியினரிடையே அரசியல் பணிகளை மேற்கொண்டு அவர்களை அமைப்பாக்கிட முயன்றார்.  அந்த சமூகத்துப் பெண் ஒருவரை மணந்து பின்னர் அவரோடு ரங்கூனுக்குச் சென்றார்.  அங்கு ஆண் குழந்தையொன்று பிறந்ததெனவும் அங்கே அவர் மனைவி இறந்து போனதால் அயோத்திதாசர் சென்னைக்குத் திரும்பி வந்தாரெனவும் தி. பெ. கமலநாதன் கூறுகிறார்.  (பார்க்க: போதி _ காலாண்டிதழ் ஏப்ரல் 2005, பக் 15).  ரங்கூனில் பிறந்த மகன் அங்கேயே தங்கிவிட்டாரெனவும் அவர் குறிப்பிடுகின்றார்.  இந்தச் செய்தியைத் தவிர பண்டிதரின் ரங்கூன் வாழ்க்கை குறித்த செய்திகள் நமக்கு அதிகம் கிடைக்கவில்லை.

அயோத்திதாசர் தமது இருபத்தைந்தாவத வயது முதற் கொண்டே (1870) ஒடுக்கப்பட்ட மக்களின் வாழ்வியல் மேம்பாட்டுக்காகப் பல்வேறு நடவடிக்கைகளில் ஈடுபட்டாரெனத் தெரிகிறது. தமிழ் இலக்கியத்தில் அவருக்கிருந்த ஆழ்ந்த புலமை தனித்துவமான தத்துவப் பார்வையொன்றை நோக்கி அவரை இட்டுச் சென்றது. அவரது மெய்யியலின் உள்ளீடாகத் தொடக்ககாலம் முதலே பகுத்தறிவு என்பதுதான் இடம் பெற்றிருந்தது.  கடவுள் நம்பிக்கை, சடங்குகளை உயர்த்திப் பிடித்தல், பார்ப்பன வைதீக மதக் கொள்கை முதலானவற்றை முற்றாக நிராகரித்து மானுட விடுதலைக்கான ஒரு தத்துவமாகவே அவரது பார்வை உருப்பெற்றிருந்தது.

அயோத்திதாசரின் அரசியல் பணிகள் தொடங்குவதற்கு சுமார் நூறு ஆண்டுகளுக்கு முன்பே அதாவது 1779ஆம் ஆண்டிலேயே- _ பறையர் சமூகத்தவர் ஒன்று திரண்டு தமது உரிமைகளுக்காக ஆங்கில அரசிடம் மனு ஒன்றைக் கொடுத்துள்ளனர்.  புனித சார்ச் கோட்டைக்கு அருகில் குடியிருந்த பறையர்களை அங்கிருந்து காலி செய்துவிட்டு வெளியேறும்படி ஆங்கில அரசாங்கம் கூறியபோது, தாமும் தமது முன்னோரும் ஆங்கில அரசுக்குச் செய்த பணிகளைக் குறிப்பிட்டு அப்பகுதியில் தாம் தொடர்ந்து குடியிருக்க இசைவுதரும்படி அம்மனுவில் அந்த மக்கள் கேட்டிருந்தனர்.

சென்னை சார்ச் டவுனில் பறையர் குடியிருந்த பகுதி பெரிய பறைச் சேரி எனவும், பின்னர் அது ப்ளாக் டவுன் எனவும் வழங்கப்பட்டது.  அங்க குடியிருந்தவர்கள் அரசுக்கு வரி கட்ட வேண்டும் என உத்தரவு பிறப்பிக்கப்பட்டபோது அந்த வரியை ரத்து செய்ய வேண்டுமென 1810ஆம் ஆண்டு அங்கே குடியிருந்த அரசுக்கு வேண்டுகை ஒன்றை அளித்தனர்.

தீண்டாத மக்களின் இந்த அரசியல் நடவடிக்கைகளுக்கும் இந்தியாவில் ஆங்கிலேயர் நிலை பெற்றதற்குமிடையே ஒரு தொடர்பு உள்ளது.  இக் காலகட்டத்தில்தான் இந்தியா வெற்றி கொள்ளப்பட்டது என அம்பேத்கார் குறிப்பிடுகிறார். (தொகுதி 23 பக்கம் 122_123) 1757ஆம் ஆண்டில் நடைபெற்ற பிளாசிப்போர் தொடங்கி 1818இல் நடைபெற்ற கோரேகௌன் போரின் வெற்றியோடு ஆங்கிலேயர் ஆட்சி இந்தியாவில் உறுதிப்பட்டது.

"பிளாசிப் போரில் கிளைவுடன் சேர்ந்து போரிட்டவர்கள் துசாத்துகள்.  அவர்கள் தீண்டாத சமூகத்தைச் சேர்ந்தவர்கள்.  கோரேகௌன் போரில் பங்குகொண்டு சமர் புரிந்தவர்கள் மகர்கள்.  அவர்களும் தீண்டாத சமூகத்தவரே ஆவார்கள்." என அம்பேதகர் குறிப்பிடுகின்றார்.  ஆங்கிலேயர் ஆட்சிக்குத் தாங்கள் தந்த பலிகளையும் உழைப்பையும் குறிப்பிட்டே தீண்டாத மக்கள் வேண்டுகைகளை அளித்தார்கள்.

இப்படிக் கூட்டாகச் சேர்ந்து கோரிக்கைகளை அளிப்பதே அக்காலத்தில் தீண்டாதாரின் போராட்ட மரபாக இருந்துள்ளது.  ஆனால், அதே காலகட்டத்தில் பிராமணர்கள் தமது நோக்கங்களை நிறைவேற்றிக் கொள்ள அச்சுறுத்துவது, தம்முடைய குழந்தைகளையும் பெண்களையும் கொலை செய்வது, அவர்களை உயிரோடு எரிப்பது முதலான வழிமுறைகளைக் கையாண்டு வந்தனர்.  இந்த வழக்கத்தைத் தடைசெய்து 1795ஆம் ஆண்டு வங்காள ஒழுங்குமுறைச் சட்டம் என்றொரு சட்டத்தை ஆங்கிலேயர் கொண்டு வந்தனர். (அம்பேத்கார் நூல் தொகுதி 23 பக்கம் 165_ 177)

சென்னை மாகாணத்தைச் சேர்ந்த சாதியற்ற தொல்குடி மக்களின் அரசியலில் ஒரு முடுக்கத்தை ஏற்படுத்தியவர் அயோத்திதாசர் ஆவார்.  இந்தியாவில் குடிக்கணக்கெடுப்பு எடுக்கும் வழக்கம் தொடங்கியபோது அதனை ஒரு அரசியல் போராட்டத்துக்கான வாய்ப்பாக அயோத்திதாசர் அடையாளம் கண்டார்.  தீண்டாதாராய் வைக்கப்பட்டிருந்த தொல்குடி மக்களிடம் அரசியல் ரீதியான விழிப்புணர்வை உண்டாக்க, அவர்கள் தம்மை "சாதியற்ற திராவிடர்கள்" எனக் குடிக் கணக்கெடுப்பில் பதிந்து கொள்ள் வேண்டும் என அவர் அறிவுறுத்தினார்.

1881ஆம் ஆண்டுதான் இந்தியாவில் முதன் முதலாக பொதுக்குடிக்கணக்கெடுப்பு நடத்தப்பட்டது.  பல்வேறு சாதிகளைச் சேர்ந்தவர்களின் மக்கள் தொகையைக் கண்டறிந்து இந்தியாவின் மொத்த மக்கள் தொகையை அளவிடுவது ஒன்றே அந்த குடிக்கணக்கெடுப்பின்போது சாதிவாரியகக் கணக்கெடுக்குமட் முயற்சி மேற்கொள்ளப் பட்டது.  1901இல் மக்கள் தொகைக் கணக்கெடுப்பு மேற்கொள்ளப்பட்டபோது "உள்ளூர் மக்களின் கருத்துகிணங்க சமூக ரீதியில் வகைப்படுத்துதல்" என்ற புதிய முறையை ஆங்கில அரசு அறிமுகப்படுத்தியது.

1911ஆம் ஆண்டில் எடுக்கப்பட்ட நான்காவது குடிக்கணக்கெடுப்பின் போதுதான் தீண்டாத மக்கள் எவ்வளவு பேர் இந்த நாட்டில் உள்ளனர் என்று தனியே கண்டறிவதற்கான முயற்சியை அரசாங்கம் மேற்கொண்டது.  இருபதாம் நூற்றாண்டின் முதல் பத்து ஆண்டுகளில்தான் இந்திய அரசியலில் முஸ்லிம்களின் போராட்டம் எழுச்சி பெற்றது.

சட்டமன்றங்களில் தங்களுக்கு வேண்டிய பிரதிநிதித்துவம் வேண்டுமெனக் கேட்டு அவர்கள் போராடி வந்தனர்(அம்பேத்கர் ஆங்கில நூல் தொகுதி 5, பக்கம் 229_246) 1909ஆம் ஆண்டு ஜனவரி 27ஆம் தேதி இசுலாமியர்களின் குழு ஒன்று மார்லி பிரபுவைச் சந்தித்து மனு ஒன்றைத் தந்தது.  அதுவரை தீண்டாத மக்களை ஒரு பொருட்டாகவே நினைக்காத சாதி இந்துக்கள் அப்போதுதான் தீண்டாதாரின் மக்கள்தொகை முகாமைத்துவத்தை உணர்ந்தனர்.  தீண்டாத மக்களைத் தனியே கணக்கெடுப்புச் செய்வது ஆங்கில ஆட்சியாளர்களும் இசுலாமியர்களுக்கும் செய்யும் கூட்டுச்சதி என அவர்கள் கூக்குரலிட்டனர்.  ஆனால், அந்த எதி£ப்புகளைத் தாண்டி குடிக்கணக்கெடுப்பு முற்றுப் பெற்றது.  

1911ஆம் ஆண்டு குடிக்கணக்கெடுப்பின் போது இந்துக்களையும், இந்துக்கள் அல்லாதவர்களையும் பிரித்தறிய கேட்கப்பட்ட வினாக்களை ஆதரித்து அயோத்திதாசர் எழுதினார் (31.11.1910), "பாப்பானுக்கு வேறு தெய்வம் பறையனுக்கு வேற தெய்வமென்று பாடித் திரிகின்றவர்களும்; பறையனை பிணத்திற்கு ஒப்பானவன், பிணத்தைக் கண்டாலும் தொட்டாலும் ஸ்நானம் செய்வது போல பறையனைக் கண்டாலும் தொட்டாலும் ஸ்நானம் செய்ய வேண்டுமென்ற மனுசாஸ்திரம் எழுதி வைத்துக் கொண்டிருப்பவர்களும்" சென்சஸ் கமிஷனர் தான் பிளவுபடுத்தப் பார்க்கிறார் என வீண் கூச்சல் போடுவது ஏனென்று கேட்டார்.  "இக்குடிமதிப்புக் காலத்தையே குலச் சிறப்பின் காலமெனக் கருதி சீலம் பெற்று இராஜாங்கத்ததார் நன்னோக்கத்திற்கு இசைந்து நன்மார்க்கமும் நற்சீரும் அடைய வேண்டும்" என்பதே அவரது நோக்கமாக இருந்தது.

நமக்கு இப்போது கிடைக்கிற விவரங்களைக் கொண்டு பார்த்தால் இந்திய அளவில் குடிக்கணக்கெடுப்பின்போது அயோத்திதாசரைப் போல அதனை ஓர் அரசியல் பிரச்சினையாக மாற்றியவர்கள் வேறு யாரும் கிடையாது.  இந்துக்களை விட்டு அகன்ற கிறித்தாவ்களாகவோ, இசுலாமியர்களாகவோ, பௌத்தர்களாகவோ மாறிவிடுங்கள் என தீண்டாத மக்களுக்கு அப்போது அவர் ஆலோசனை கூறினார்.

1881 குடிக்கணக்கெடுப்பின்போது தொடங்கி பின்னர் 1911இல் குடிக்கணக்கெடுப்பு எடுக்கப்பட்ட காலம் வரை சாதியற்ற தொல்குடி மக்களின் தனித்துவமான அடையாளத்தைப் பேண அவர் கடுமையாகப் போராடியிருப்பது வியப்பளிக்கிறது.

"இந்துக்களுக்கு மத்தியில் இந்துவல்லாமல் வாழ்பவர்கள் இத்தேசப் பூர்வக்குடிகளேயாகும்.  இக்கூட்டத்தோருக்கு இந்துக்கள் சத்துருக்களேயன்றி மித்துருக்கள் ஆகமாட்டார்கள்.  பெரும்பாலும் இவர்கள் சாதிபேதமற்ற திராவிடர்களும், மதத்தில் பௌத்தாகளுமேயாகும். . . சென்ற குடிமதிப்பெடுத்த காலத்தில் பறையனென்னும் பெயர் ஆயிரத்து ஐநூறு வருடங்களுக்குப் பின்னரே தோன்றிய சாதிப் பெயரென்று சென்ற சென்சஸ் கமிஷனர் தன்னுடைய குடிமதிப்பு ரிப்போர்ட்டு புத்தகத்திலும் வெளியிட்டுருக்கின்றார்கள்.  இவைகள் யாவையும் தற்கால சென்சஸ் கமிஷனர் கனந்தங்கிய மிஸ்டர் கேய்ட் அவர்கள் கண்ணுற்று குடிமதிப்பு எடுக்குங்கால் தங்கள் அறியாமையாலும், பயத்தினாலும் இந்துக்களுக்குப் புறம்பான பூர்வ குடிகளில் சிலர் பறையர்களென்றும் கூறுவார்கள்.  அவர்கள் யாவரையும் அப்பெயரால் குறிக்காது 'சாதிப்பேதமற்ற திராவிடர்களென' ஒரே பெயரால் -குறிப்பது உத்தமமும், பிரிட்டிஷ் ஆட்சியில் இந்துக்கள் அடையும் சுதந்திரங்களைச் சாதிபேதமற்ற திராவிடர்டகள் அடையவும் ஏதுவுண்டாகும்," என அயோத்திதாசர் எழுதியுள்ளார் (17.12.1910)

அதுமட்டுமல்லாது கிருத்தவர்களையும், இசுலாமியர்களையும் தவிர்த்து பிறர் அனைவரையும் இந்துக்களென்றே குடிக்கணக்கெடுப்பில் குறிக்க வேண்டும் என்று வடநாட்டினர் சிலர் ஏடுகள் வாயிலாகத் தெரிவித்துவந்த கருத்துக்களையும் கடுமையாக அவர் எதிர்த்துள்ளார்.

ஏசு கிறித்துவின் போதனைகள் கிருத்தவ மதத்தின் மையமாக இருப்பது போல; நபிகளின் போதனைகள் மகம்மதியர்களின் மதநம்பிக்கைக்கு ஆதாரமாக இருப்து போல இந்து மதத்துக்கு எதுவும் கிடையாது என்பதை கேலியோடு அவர் சுட்டிக் காட்டினார்.  "இந்து என்பவனுக்கு தேசமும் கிடையாது.  பெற்று வளர்த்த தந்தையாரும் கிடையாது. அவன் போதித்த தர்மமும் இன்னதென்று கிடையாது.  அவனால் சீர்திருத்திய மக்கள் கூட்டமும் கிடையாது.  அவனது சரித்திரமும் கிடையாது.  இத்தகைய யாதுமற்றோன் மதம் இந்து மதமாம்.  எந்த மதத்திற்கும் சொந்த மில்லாத மாம் இந்து மதமெனில் அவை யாருக்குரியவை? யார் அவற்றைத் தழுவுவார்?. . . . . .  இந்து ஒருவன் உண்டாவென்னில் வேதாந்தி மதம் என்பதும்; வேதாந்தி ஒருவன் உண்டாவென்னில் அத்துவித மதம் என்பதும்; அத்துவிதி என்பவன் ஒருவன் உண்டாவென்னில் விசிட்டாத்துவித மதம் என்பதுமாகிய மாறுதலைக் கூறிவருவார்களன்றி எதற்கும் தக்க ஆதாரங்களைக் கொடுக்கமாட்டார்கள்." என்று குறிப்பிட்ட அயோத்திதாசர், கிருத்தவர்களும் மகமதியர்களும் இந்த தேசத்தாருடன் சகல பாவனைகளிலும் சம்பந்தித்திருக்கின்றார்கள்.  அவர்களை விலக்கச் சொல்வின்றவர்கள் இந்த தேசத்தோருடன் ஒரு சம்பந்தமும் வைத்துக் கொள்ளாத ஆரியர்களை இந்த நாட்டிலிருந்து அகற்ற முன் வருவார்களா? என்றும் கேட்டார்.

ஆக, அயோத்தி தாசரின் திராவிட அடையாளம் என்பது சாதிபேதமற்றது.  தனித்துவமானது. அது, கிறித்தவர்களை, இசுலாமியர்களை சகோதரர்களாகப் பார்க்கின்ற ஓர் அடையாளமுமாகும்.   

தமிழ்ச் சமூகத்துக்கு இன்றும் பயன்படக்கூடிய சிந்தனைகளை முன்வைத்த அயோத்திதாசப் பண்டிதர் 1914 ஆம் ஆண்டு மே மாதம் 5 ஆம் நாள் சம்மணமிட்டு அமர்ந்த நிலையில் பௌத்த மந்திரங்களை உச்சரித்தபடி இந்த உலகைத் துறந்தார். இன்று அவரது நினைவு நாள். 

பகவன் புத்தர் துவக்கிய யுத்தத்தில் பங்கேற்போம்! " -ரவிக்குமார்



தலித் மக்கள் இந்த தேசத்தை வளப்படுத்த தமது வியர்வையை வழங்குகிறவர்கள்; தலித் மக்கள் ஒரு கவளம் சோறு தந்தவர்க்கும் நன்றி பாராட்டி தம் உதிரத்தை வழங்குகிறவர்கள்; தலித் மக்கள் தமது தன்மானத்துக்கு ஊறு நேரிட்டால் தம் உயிரையும் கொடுப்பவர்கள்- வழங்கி வாழும் அந்த மக்களின் தொடர்ச்சியாக இந்த விருது வழங்கும் விழா!

இந்த நாள் விடுதலைச் சிறுத்தைகளின் வரலாற்றில் மட்டுமல்ல இந்திய வரலாற்றிலும் முக்கியமான நாள். கடந்த ஆறு நாட்களாக உச்சநீதிமன்றத்தில் நடந்துவந்த வழக்கின் வாதம் நிறைவடைந்து தீர்ப்பு ஒத்திவைக்கப்பட்டுள்ளது. ஆதார் எண்ணுடன் வரி செலுத்துவதற்கான பான் கார்டை இணைப்பதென்று மத்தியில் ஆளும் பாஜக அரசு பிறப்பித்துள்ள ஆணையை எதிர்த்த வழக்கு அது. வெறும் ஆதார் தொடர்பான பிரச்சனை அல்ல இது, இந்தியாவின் அரசியல் போக்கையே ஆட்சி முறையையே மாற்றப்போகிற ஆதாரமாக அமையப்போகிற வழக்கு.

இந்த வழக்கில் இந்தியாவின் தலைமை வழக்குரைஞர் எடுத்து வைத்துள்ள வாதம் இந்த நாடு எந்தத் திசை நோக்கிப் பயணித்துக்கொண்டிருக்கிறது என்பதற்கு சாட்சியமாக இருக்கிறது. " இந்தியக் குடிமக்களுக்கு அவர்களது உடல்மீதுள்ள அதிகாரம் முழுமையானதல்ல. அவர்களது உடல்மீது அரசாங்கத்துக்கு இருக்கும் அதிகாரத்தை எவராலும் தடுக்கமுடியாது. கை ரேகையை, கண்ணின் கருவிழி ரேகையை மட்டுமல்ல குடிமக்களின் ரத்தத்திலுள்ள  டிஎன்ஏவைக்கூட பதிவுசெய்யப்போகிறோம்" என்று அவர் கூறியிருக்கிறார். நமது உடலும் நமக்கு சொந்தமில்லை என்று சொல்கிறார்கள் இன்றைய ஆட்சியாளர்கள்.

இன்று ஆதார் வழக்கில் அரசை எதிர்த்து வாதங்களை முன்வைத்த வழக்குரைஞர் அர்விந் தத்தார் தனது வாதத்தை முடிக்கும்போது அமெரிக்காவில் நிறபெறிக்கு எதிராக பாடுபட்ட நீதிபதி வில்லியம் டக்ளஸ் அவர்களின் வார்த்தைகளை மேற்கோள் காட்டியிருக்கிறார். " இரவு சட்டென்று கவிந்துவிடுவதில்லை. அதுபோலத்தான் ஒடுக்குமுறையும். எல்லாம் மாறாமல் இருக்கிறது எனத் தோன்றும்போது அந்த இருளுக்கிடையே விடியலின் வெளிச்சக்கீற்று அவ்வப்போது தென்படும். அதில் நாம் சிறிய சிறிய அளவில் நடந்துகொண்டிருக்கும் மாற்றங்களைப் பார்க்கிறோம். நாம் இந்த இருட்டின் பலிகளல்ல என்பதை உணர்கிறோம்" என்று அவர் கூறியிருக்கிறார். அந்த நம்பிக்கையை நாம் வழிமொழிகிறோம்.

வாஜ்பாய் தலைமையில் பாஜக ஆட்சி நடைபெற்றபோது அரசியலமைப்பு சட்டத்தை மாற்றியெழுத முயற்சித்தார்கள். அப்போது குடியரசுத் தலைவராக இருந்த கே.ஆர்.நாராயணன் " இந்த நாட்டில் ஒரு எதிர்ப்புரட்சி நடைபெறுகிறது " என புரட்சியாளர் அம்பேத்கரின் சொற்களைப் பயன்படுத்தி எச்சரித்தார். ஒற்றை மனிதராக நின்று அப்போது வகுப்புவாத செயல்திட்டத்தை முறியடித்தார். இன்று அந்த எதிர்ப்புரட்சி மிக வேகமாக நடந்துகொண்டிருக்கிறது. அரசியலமைப்புச் சட்டத்தின்மீது ஒரு யுத்தத்தை வகுப்புவாத சக்திகள் தொடுத்திருக்கின்றன. இதை எதிர்த்து நிற்கப்போகும் சக்திகள் யார்? என்ற கேள்வி இப்போது எழுந்திருக்கிறது.

விடுதலைச் சிறுத்தைகள் ஒரு சிறிய கட்சியாக இருக்கலாம், எங்களுக்கு சட்டமன்ற உறுப்பினரோ, நாடாளுமன்ற உறுப்பினரோ இல்லாமல் இருக்கலாம், ஆனால் ஒடுக்கப்பட்ட மக்களின் உரிமைகளைப் பறிக்கிற வகுப்புவாதத்தை எதிர்க்கவேண்டிய  இந்தக் கடமையை நாங்கள் உணர்ந்திருக்கிறோம்.

வகுப்புவாதத்துக்கு எதிரான இந்த யுத்தம், சமத்துவ உரிமைகளை காப்பதற்கான இந்த யுத்தம் - இது 2600 ஆண்டுகளுக்கு முன்னால் பகவன் புத்தர் தொடுத்த யுத்தம், புரட்சியாளர் அம்பேத்கர் முன்னெடுத்த யுத்தம், சமத்துவத்துக்கான அந்த யுத்தத்தில் தலைவர் எழுச்சித் தமிழர் தலைமையில் உதிரத்தை மட்டுமல்ல உயிரையும் கொடுப்போம். அதற்கு இந்த நாளில் சூளுரை ஏற்போம்! நன்றி,  வணக்கம்!


( 04.05.2017 அன்று சென்னை காமராசர் அரங்கில் விசிக சார்பில் நடைபெற்ற விருதுகள் வழங்கும் விழாவில் ஆற்றிய உரை)

Tuesday, May 2, 2017

சமஸ்கிருத அறிஞர் திரு. வரத தேசிகர் (1923-2017) மறைந்தார் - ரவிக்குமார்



பிரெஞ்சு கீழ்த் திசைப் பள்ளியில் (EFEO) நீண்டகாலம் பணியாற்றி ஓய்வுபெற்ற சமஸ்கிருத அறிஞர் திரு வரத தேசிகர் அவர்கள் இன்று (02.05.2017) காலை 11.30 மணி அளவில் இயற்கை எய்தினார் என்ற துயரச் செய்தியை திரு ழான் லுய்க் செவ்வியார் மின்னஞ்சல் மூலம் தெரிவித்திருக்கிறார். 

கிரந்த யூனிகோடு பிரச்சனை தீவிரமாக இருந்த நேரத்தில் அது தொடர்பாகத் தெளிவு வேண்டி நான்  பாண்டிச்சேரியில் இருக்கும் EFEO நிறுவனத்துக்குச் சென்று திரு.செவ்வியார் அவர்களைச் சந்தித்து அவரிடம் பல்வேறு ஐயங்களையும் எழுப்பி விளக்கங்களைப் பெற்றேன். அப்போது அங்கு பணியாற்றும் சமஸ்கிருத அறிஞர் திரு. வரத தேசிகர் அவர்களைப் பார்த்துப் பேசியது ஒரு அபூர்வமான நிகழ்வு. 

அபோது ஏறத்தாழ தொண்ணூறு வயதை நெருங்கிக்கொண்டிருந்த அவர் தமிழ், சமஸ்கிருதம், கிரந்தம், ஆங்கிலம் என நான்கு மொழிகளில் ஆழ்ந்த புலமை கொண்டவர். கிரந்த ஏட்டுச்சுவடிகளை படிக்கத் தெரிந்த மிகச்சிலரில் ஒருவர். திரு. செவ்வியாரின் உதவியால் அவரது பணிகள் குறித்துக் கேட்டு அறிந்துகொள்ளும் வாய்ப்பு எனக்குக் கிடைத்தது.

கிரந்த எழுத்துகள் கலந்து எழுதப்பட்ட ஓலைச் சுவடிகளை அவர் என்னிடம் படித்துக் காட்டினார். 

சுவடிகளில் இருப்பவற்றை இருபதாம் நூற்றாண்டின் துவக்கத்தில் அச்சில் வெளிக்கொண்டுவந்தபோது கிரந்த எழுத்துகளோடுதான் அச்சிட்டிருக்கிறார்கள். அப்படி 1910 ஆம் ஆண்டில் பதிப்பிக்கப்பட்ட நாலாயிரத் திவ்வியப் பிரபந்த நூலை நான் அவரிடம் பார்த்தேன். 

அதுபோன்ற நூல்களைப்  பின்னர் பதிப்பித்தபோது கிரந்த எழுத்துகள் இருந்த இடங்களில் எல்லாம் தேவநாகரி எழுத்துகள்கொண்டு அச்சிடப்பட்டிருக்கிறது. அப்படியான நூல்களையும் அங்கு பார்க்க முடிந்தது. 

இப்படி தேவநாகரி கலந்து அச்சிடுவதைவிட கிரந்த எழுத்துகளைக்கொண்டு அச்சிடுவதே சிறந்தது என திரு. ஜார்ஜ் ஹார்ட் அவர்கள் எழுதியிருப்பது நினைவுக்கு வந்தது.

கிரந்த யூனிகோடு சர்ச்சை குறித்து திரு. வரத தேசிகர் எதுவும் அறிந்திருக்கவில்லை. அவர் தானுண்டு தன் பணியுண்டு என இருந்தார்.

1923 ஆம் ஆண்டு காஞ்சிபுரத்தில் பிறந்த திரு வரத தேசிகர்  தனது தந்தையிடமிருந்து கிரந்தம் படிக்கக் கற்றுக்கொண்டார்.கலித்தொகை உள்ளிட்ட சங்க இலக்கிய நூல்களையும்,  ஆழ்வார் பாடல்களையும், மத்தியகால இலக்கியங்கள் சிலவற்றையும்  ஆங்கிலத்தில் மொழிபெயர்க்க அவர்  உதவினார். அயல்நாட்டு ஆய்வாளர்கள் பலர் அவரால் தமிழ் ஆய்வில் ஈடுபடுத்தப்பட்டனர். 

தம்மிடம் கிரந்தம் கற்றுக்கொள்ள எவரும் முன்வரவில்லையென அவரை சந்தித்தபோது வருத்தத்தோடு என்னிடம் சொன்னார். அவரது அறிவுச்செல்வம் தொடர்ச்சியின்றி அழியப்போவதை எண்ணி அப்போது எனக்குக் கவலையாக  இருந்தது.

இப்போது கிரந்தம் படிக்க யாராவது விரும்பினாலும்கூட கற்றுத்தர அவர் இல்லை. திரு வரத தேசிகருக்கு என் அஞ்சலி

Sunday, April 30, 2017

தலித்துகளை விலக்கி வைத்த திராவிட அரசியல்` - ரவிக்குமார்




வணக்கம்


தமிழ்நாட்டில் கடந்த 50 ஆண்டுகளாக நடைபெற்றுவரும் திராவிட கட்சிகளின் ஆட்சியை மதிப்பீடு செய்யும்விதமாக பிபிசி தமிழோசை தொடர்ந்து கட்டுரைகளை வெளியிட்டு வருகிறது. மு.நாகநாதன், கோபாலகிருஷ்ண காந்தி, சு.பொ.அகத்தியலிங்கம் ஆகியோரின் கட்டுரைகளைத் தொடர்ந்து இன்று (01.05.2017) எனது கட்டுரை வெளியாகியிருக்கிறது. அந்தக் கட்டுரையை இங்கே தந்துள்ளேன். 

அன்புடன்
ரவிக்குமார் 


====




`தலித்துகளை விலக்கி வைத்த திராவிட அரசியல்`

- ரவிக்குமார் எழுத்தாளர், கவிஞர்

திமுக தலைமையிலான ஆட்சி தமிழ்நாட்டில் ஏற்பட்டு 50 ஆண்டுகள் ஆகிறது. 

ஆளுநர் ஆட்சி என்ற சிறு குறுக்கீடுகளைத் தவிர திமுகவும் அதிலிருந்து உருவான அதிமுகவும் தான் இந்த மாநிலத்தை கடந்த ஐம்பது ஆண்டுகளாக ஆட்சி செய்துவந்துள்ளன. 

திமுக, அதிமுக இரண்டும் பொதுவாக 'திராவிடக் கட்சிகள்' என அழைக்கப்பட்டாலும் அரசியல் அணுகுமுறைகளில் அவற்றுக்கிடையே மிகப்பெரும் வேறுபாடு உள்ளது. 

பிராமணரல்லாதார் இயக்கம், நீதிக் கட்சி ஆகியவற்றின் கருத்தியல் தொடர்ச்சியை திமுகவின் ஆட்சி நிர்வாகத்தில் பார்க்கலாம். 

அதற்கு மாறாக, அதிமுகவைத் தோற்றுவித்த எம்ஜிஆரின் கவர்ச்சிவாத (Populism) அரசியலை அதிமுக ஆட்சி நிர்வாகத்தில் காணலாம். 

1967 -2017 க்கு இடைப்பட்ட அரை நூற்றாண்டுகால ' திராவிடக் கட்சிகளின் ' ஆட்சியை தலித் நோக்கில் மதிப்பிடவேண்டுமெனில் இந்த இரு கட்சிகளின் அடிப்படையாய் அமைந்த பிராமணரல்லாதார் அரசியலையும், கவர்ச்சிவாத அரசியலையும் நாம் தனித்தனியே ஆராய்ந்தாகவேண்டும். 

தமிழகத்தில் சாதி மோதல்கள் அதிகரிப்பு ஏன்?

கடந்த ஐம்பதாண்டுகளில் தலித் மக்களின் வாழ்க்கைத் தரம் ஒப்பீட்டளவில் உயர்ந்து வந்திருக்கிறது எனினும் அதிகாரத்தை சுவைப்பதிலிருந்து அவர்கள் ஒதுக்கியே வைக்கப்பட்டிருக்கின்றனர். 

சுருக்கமாகச் சொன்னால், திமுக பின்பற்றிய பிராமணரல்லாதார் அரசியல் தலித்துகளை விலக்கி வைத்து வஞ்சித்தது, அதிமுகவின் கவர்ச்சிவாத அரசியலோ தலித்துகளை உள்வாங்கி ஒழித்துக்கட்டியது. 

பிராமணரல்லாதார் அரசியலும் தலித்துகளும்

பிராமணரல்லாதார் அரசியல் துவங்கிய காலந்தொட்டே தலித்துகளை உள்ளடக்குவதில் அக்கறை காட்டவில்லை.1906 ஆம் ஆண்டு சென்னையைச் சேர்ந்த வழக்குரைஞர்கள் பி. சுப்பிரமணியம் மற்றும் எம். புருசோத்தம் நாயுடு ஆகியோர் இணைந்து 'தி மெட்ராஸ் நான் பிராமின் அசோசியேசன்' என்ற அமைப்பை உருவாக்க முயற்சி செய்து அது தோல்வியில் முடிந்த காரணத்தால் 1916இல் வெளியிடப்பட்ட 'பிராமணரல்லாதார் பிரகடனமே' பின்னாளில் வந்த திராவிட இயக்கங்களுக்கு முன்னோடியாக அமைந்தது. 

தாழ்த்தப்பட்ட பெண்படத்தின் காப்புரிமைSEBASTIAN D'SOUZA/AFP/GETTY IMAGES

அந்தக் கொள்கைப் பிரகடனத்தைத் தொடர்ந்து 1916 நவம்பர் 20ஆம் தேதி சென்னை விக்டோரியா மன்றத்தில் கூடிய 'பிராமணரல்லாத' சாதிகளைச் சேர்ந்த பெரிய மனிதர்கள் அரசியல் இயக்கமொன்றைத் துவங்க முடிவு செய்து அதற்கான அறிவிப்பை வெளியிட்டனர். 

தென்னிந்திய நல உரிமைச் சங்கம் (சவுத் இண்டியன் லிபரல் ஃபெடரேசன்) எனப் பெயரிடப்பட்ட அந்த இயக்கத்தின் சட்டதிட்டங்களில், "பிராமணரல்லாதார்' என்ற சொல் முகமதியர்கள் இந்தியக் கிறித்தவர்கள், ஆங்கிலோ இந்தியர்கள் இங்கே வாழும் ஐரோப்பியர்கள் ஆகியோரையும் உள்ளடக்கியது" எனக் குறிப்பிட்டிருந்தனர். அந்த இயக்கத்தின் குறிக்கோளிலோ, உறுப்பினர் தகுதி பற்றிய விளக்கத்திலோ,பிராமணரல்லாதார் யார் என்பதற்கு அளிக்கப்பட்ட வரையறையிலோ தலித்துகள் உள்ளடக்கப்படவில்லை. 

பிராமணர் அல்லாதார் இயக்கம் பிராமண ஆதிக்கத்தை எதிர்த்து அதிகாரத்தில் பங்கு கோருவதாக இருந்ததே தவிர சாதி ஒழிப்பை வலியுறுத்தவில்லை. அதனால்தான் பிராமணரல்லாதார் என்ற வகைப்பாட்டை துவக்கத்திலேயே அயோத்திதாசப் பண்டிதர் கேள்விக்குட்படுத்தினார். 

சாதி ரீதியான ஜனத்தொகை கணக்கெடுப்பு தேவையா?

" சாதி ஆச்சாராங்களையும் சமய ஆச்சராங்களையும் தழுவிக் கொண்டே 'நான் பிராமின்ஸ்' ( Non Brahmins ) என்று சங்கம் கூட்டியிருக்கின்றனரா அன்றேல் சாதியாசாராங்களையும் சமய ஆசாரங்களையும் ஒழித்து 'நான் பிராமின்ஸ்' என்ற சங்கம் கூடியிருக்கின்றனரா விளங்கவில்லை….. பிராமணர் என்போரால் வகுத்துள்ள சாதி ஆசாரங்களையும் சமய ஆசாரங்களையும் வைத்துக் கொண்டு நான் பிராமின்ஸ் எனக் கூறுவது வீணேயாகும்" , என்று அவர் விமர்சித்தார் ( தமிழன், செப்டம்பர் 15, 1909 ) 

பிராமணரல்லாதார் இயக்கத்தின் அடுத்தகட்ட வளர்ச்சியாக உருவெடுத்த நீதிக்கட்சி, 1920ஆம் ஆண்டில் ஆட்சி அமைக்கும் வாய்ப்பைப் பெற்றது. 

அந்த ஆட்சி, தலித் மக்களின் கல்வி, பொருளாதாரம், அரசியல் பிரதிநிதித்துவம் ஆகியவற்றில் அக்கறை காட்டாதது மட்டுமின்றி, 1921 ல் நடைபெற்ற பி அண்டு சி மில் போராட்டத்தின்போது தலித்துகளை சென்னை நகரைவிட்டே வெளியேற்றவும் முயற்சித்தது என அப்போது தலித் மக்களின் நாடறிந்த தலைவராக விளங்கிய எம். சி. ராஜா குற்றம் சாட்டினார் (The Oppressed Hindus, The Huxley Press,Madras,1925 ) 

திமுகவும் தலித்துகளும்

1967 ல் திமுக ஆட்சி அதிகாரத்துக்கு வந்தபோது அரசாங்கத்தின் பல்வேறு நிலைகளிலும் பிராமணரல்லாதார் முக்கியத்துவம் பெற்றனர். 

அரசியல் அதிகாரத்தின் ருசிகண்டதாலோ என்னவோ பிராமணரல்லாதார் தமது வலிமையை சமூகப் படிநிலையில் தமக்குக் கீழிருந்த மக்கள்மீது சோதித்துப் பார்க்கத் தலைப்பட்டனர். 

அதன் விளைவாகவே உலகத்தையே அதிரவைத்த கீழ்வெண்மணிப் படுகொலை (1969) நிகழ்த்தப்பட்டது. 

தலித் சமூகத்தினர்.படத்தின் காப்புரிமைREUTERS

அந்தக் கொலைகாரர்களுக்குத் தண்டனை பெற்றுத் தருவதற்குக்கூட அன்றைக்கிருந்த திமுக ஆட்சி அக்கறை காட்டவில்லை. அதனால்தான் அந்த வழக்கில் குற்றம் சாட்டப்பட்ட 25 பேரையும் சென்னை உயர்நீதிமன்றம் விடுதலை செய்யும் நிலை ஏற்பட்டது. 

திமுக ஆட்சியிலிருந்த சுமார் 22 ஆண்டுகளில் தலித் மக்களின் கல்வியறிவை மேம்படுத்த பள்ளிகளை உருவாக்குதல், இலவச வீட்டுமனைப் பட்டாக்கள் அளித்தல், குடிசைமாற்று வாரியத்தின் மூலம் வீடுகளை கட்டித் தருதல், உயர்கல்வி பெறுவதற்கு லோன் ஸ்காலர்ஷிப், போட்டித் தேர்வுகளில் பங்கேற்க சிறப்புப் பயிற்சி - எனப் பல்வேறுவிதமான நலத் திட்டங்கள் உருவாக்கப்பட்டன என்பது உண்மைதான். 

அந்த நலத் திட்டங்கள் தலித் மக்களின் வாழ்க்கைத் தரத்தை உயர்த்துவதற்குப் பயன்பட்டன என்பதையும் மறுக்கமுடியாது. 

ஆனால் தலித் மக்களை அரசியல்ரீதியாக அதிகாரப்படுத்துவதில் திமுக போதுமான அளவுக்குக் கவனம் செலுத்தவில்லை. 

கட்சியில் வலிமைவாய்ந்த மாவட்டச் செயலாளர் பதவிகளிலோ, ஆட்சியில் அதிகாரம் வாய்ந்த துறைகளிலோ தலித்துகளுக்கு போதிய வாய்ப்புகளை திமுக அளிக்கவில்லை. அரசு வேலை வாய்ப்புகளிலும்கூட தலித்துகளுக்கான இட ஒதுக்கீடு திமுக ஆட்சிக்காலங்களில் சரிவர நிறைவுசெய்யப்பட்டதே இல்லை. 

தலித்துகளை நோக்கிய திமுகவின் அணுகுமுறை பெரும்பாலும் அடையாளவாதமாகவே (Tokenism ) நின்றுபோய்விட்டது.

அதுமட்டுமல்லாது திமுக ஆட்சிக் காலங்களில் வலிமைபெற்ற இடைநிலைச் சாதிகளின் ஆதிக்கம், கிராமப்புறங்களில் தலித்துகளுக்கு எதிரான வன்கொடுமைகளை அதிகரிக்கச்செய்தது.அதனால் திமுகவை தமக்கான கட்சியாக தலித் மக்களால் உணரமுடியாது போயிற்று. 

கவர்ச்சிவாத அரசியலும் தலித்துகளும்

திமுகவிலிருந்து வெளியேறி அதிமுகவை உருவாக்கிய எம்ஜிஆருக்கு இருந்த சினிமா செல்வாக்கு தலித் மக்களை அக்கட்சியை நோக்கி ஈர்த்தது. 

அதுவரை பெரும்பாலும் காங்கிரஸின் ஆதரவாளர்களாக இருந்த தலித்துகள் அதிமுகவின் வாக்குவங்கியாக மாறினர். 

ஆனால், தனக்கு மிகப்பெரும் ஆதரவு சக்தியாக இருந்த தலித்துகளை எம்ஜிஆர் அரவணைக்கவில்லை. மாறாக திமுக உயர்த்திப்பிடித்த அதே பிற்படுத்தப்பட்டோர் அரசியலைத்தான் அவரும் பின்பற்றினார். 

தலித் வீடுபடத்தின் காப்புரிமைREUTERS

கட்சியிலும் ஆட்சியிலும் பிற்படுத்தப்பட்ட வகுப்பினருக்கே முக்கியமான பதவிகளை அளித்தார். அதே நேரத்தில் கவர்ச்சிவாதத் திட்டங்களை அறிமுகப்படுத்தி தலித் மக்களின் ஆதரவைத் தக்கவைத்துக்கொண்டார். 

கவர்ச்சிவாதம் என்பது திராவிட இயக்கத்தின் கருத்தியலிலேயே கலந்திருந்த ஒன்றுதான் என்ற போதிலும் எம்ஜிஆர் கையாண்ட கவர்ச்சிவாதம் தனித்தன்மை கொண்டது. 

நேரடியாக வெகுமக்களோடு தொடர்புகொள்ளும் ஆற்றல் வாய்ந்த, ஈர்ப்பு சக்தி கொண்ட ஒரு தலைவர், அதிகாரம் அனைத்தையும் தன் கையில் குவித்துக்கொள்வது என்ற புதுவிதமான கவர்ச்சிவாதத்தை எம்ஜிஆர் கையாண்டார். 

சர்வாதிகாரத்தன்மையை உள்ளீடாகக்கொண்ட அந்த கவர்ச்சிவாதம் வெகுமக்களை செயலற்ற மந்தைகளாக சுருக்கியது. அப்படி சுருக்கப்பட்ட மக்கள் திரள் ஒரு அவதாரப் புருஷராக, தமது மீட்பராக அவரைக் கண்டது. 

அவர்களுக்கு அப்போது தேவைப்பட்டதெல்லாம் உணவு உள்ளிட்ட அடிப்படை வசதிகள்கூட அல்ல, தமது மீட்பரின் தரிசனம் மட்டுமே. 

தமது காட்சிக்காக தவம் கிடந்த மக்களை நோக்கி தனக்கு அணிவிக்கப்பட்ட மாலைகளோடு சில இலவச திட்டங்களையும் எம்ஜிஆர் அவ்வப்போது வீசிக்கொண்டிருந்தார். 

அதிலேயே அவர்கள் ஆறுதல் கண்டனர். இலவச பல்பொடி, இலவச செருப்பு, இலவச மதிய உணவு என சிறுவர் முதல் பெரியவர்கள்வரை இலவசத் திட்டங்களுக்குக் கையேந்தும் இரவலர்களாக மாற்றப்பட்டனர். 

அந்த மயக்கத்தில் மக்கள் ஆழ்ந்திருந்த நேரத்தில் இன்னொருபுறம் வரம்பற்ற சுரண்டலுக்கான திட்டங்கள் வகுக்கப்பட்டன. அவற்றை எதிர்த்து உரிமைகளுக்காகக் குரலெழுப்பியவர்கள் போலீஸாரின் துப்பாக்கிக் குண்டுகளுக்குப் பலியாக்கப்பட்டனர். 

எம்ஜிஆர் பின்பற்றிய அதே நடைமுறைகளை மேலும் மூர்க்கத்தோடு செயல்படுத்தியவர் ஜெயலலிதா. 

விளிம்புநிலை மக்களுக்காகப் பேசுதல், அவர்களை மையநீரோட்ட அரசியலுக்குள் கொண்டுவருதல், மக்களால் தேர்ந்தெடுக்கப்படாத அமைப்புகளின் அதிகாரத்தைக் கேள்விக்குட்படுத்துதல் என்பன போன்ற கவர்ச்சிவாதத்தின் சாதகமான பண்புகளை ஒதுக்கிவிட்டு, அடிப்படை உரிமைகளைப் புறக்கணித்தல், சிறுபான்மையினரின் உரிமைகளை அலட்சியப்படுத்துதல் உள்ளிட்ட அதன் எதிர்மறை அம்சங்களையே ஜெயலலிதா அதிகம் பயன்படுத்திக்கொண்டார். 

ரவிகுமார்

சாதிப் பெரும்பான்மையிலிருந்து சமயப் பெரும்பான்மைக்கு

சமூகத்தில் பெரும்பான்மையினராக இருக்கும் மக்களின் கைகளுக்கு அதிகாரம் வரவேண்டும் என்பதைத்தான் பிராமணரல்லாதார் இயக்கமும், திராவிட இயக்கமும் வலியுறுத்தின. 

அவர்கள் விரும்பியபடியே இன்றைய தமிழ்நாட்டில் ஏறக்குறைய பிராமண ஆதிக்கம் துடைத்தெறியப்பட்டு, பெரும்பான்மை சமூகக் குழுவாக இருக்கின்ற பிற்படுத்தப்பட்டோரின் கைகளில் சமூக, அரசியல், பொருளாதார,ஊடக அதிகாரங்கள் குவிக்கப்பட்டுள்ளன. 

'சாதி,மத பாகுபாடுகளுக்கு இடமில்லை': இந்தியப் பிரதமர்

திராவிடக் கட்சிகளின் ஆட்சியால் பலம்பெற்றிருக்கும் பிற்படுத்தப்பட்டோர் என்னும் இந்த சமூகப் பெரும்பான்மையானது சமயச் சார்பின்மையை உள்ளீடாகக் கொண்டதும், சமத்துவத்தை ஊக்குவிப்பதுமான 'அரசியல் பெரும்பான்மையாக' ( Political Majority ) செயல்படவில்லை. 

மாறாக, அம்பேத்கர் சுட்டிக்காட்டிய 'வகுப்புவாதப் பெரும்பான்மையாகவே' (Communal Majority ) அது தன்னைக் கட்டமைத்துக்கொண்டுள்ளது. 

அதைத்தான் ஆணவக் கொலைகள் , வெறுப்புப் பிரச்சாரம் முதலான அண்மைக்கால நிகழ்வுகள் எடுத்துக்காட்டுகின்றன. 

தந்தை பெரியாரின் சாதி ஒழிப்பு அரசியலுக்கும், அரசியலமைப்புச் சட்டத்தின் ஜனநாயக நெறிமுறைகளுக்கும் உகந்தவாறு திராவிட அரசியல் மறுவார்ப்பு செய்யப்படவில்லையெனில், கடந்த ஐம்பதாண்டுகால திராவிட ஆட்சியால் வலுப்பெற்றிருக்கும் சாதிப் பெரும்பான்மைவாதம் தன்னை சமயப் பெரும்பான்மைவாதமாக உருமாற்றிக்கொள்வதை எவராலும் தடுக்க முடியாது. 

http://www.bbc.com/tamil/india-39766644